[fuolha de un diário sien assinatura]
nesse die, oubi ua música stranha ne l rádio a la purmanhana cedo; sali a arar to l die i solo me dei de cuonta de l que se habie passado quando amostrórun l Caetano a ir preso; ls dies apuis cuntinei cul araduro, que outro remédio nun tenie para fazer por pan; fui apuis desso que me afiç mais a ber las amboras na telbizon, anque nunca tenga dado para antender l mundo: até hoije; de l que se me lhembra bien ye que ls filhos yá éran grandes para quemer muito, mas pequeinhos para quedar a sou pan quemer; l restro fui apuis i inda dura, anque nun saba bien l quei, talbeç un cierto modo de cumo la lhuç chube ls dies, talbeç un aire mais suolto, un sereno que se lhebanta de ls puiales; agora l'arada yá nada quier cumigo, mas inda me medra la grima de que nun tenga feito por pan que a la belheç chegue: talbeç de, mais que an burmeilhos crabos, siempre haber deixado ir ls uolhos ne l ancanhar de ls panes i ne l sereno mar de sou marfuolho.
Fracisco Niebro (2010)
Sem comentários:
Enviar um comentário